चैत्र २० गते २०८१
रोल्पा,१७चैत। लुंग्री गाउँपालिकाको केन्द्र किलाचौरमा सम्पन्न एक दिने विशेषज्ञ स्वास्थ्य शिविरमा १ हजार ४३ जनाले सेवा लिएका छन् । लुंग्री गाउँपालिका, लुम्बिनी सिटी अस्पताल एण्ड मेडिकल साइन्स प्रालि वुटवल, स्वास्थ्य कार्यालय रोल्पा र रोल्पा अस्पतालको संयुक्त आयोजना एंव सत्प्रयास समूहको समन्वयमा एक दिने शिविर सञ्चालन भएको थियो ।
शनिबार सम्पन्न शिविरमा हाडजोर्नी तथा नशा रोग विशेषज्ञ सेवा, प्रसुति तथा स्त्रीरोग विषेशज्ञ सेवा, रेडियोलोजी सेवा, जनरल फिजिसियन सेवा, शल्यचिकित्सा सेवा, मुख तथा दाँत सम्बन्धी लगायतका सेवाहरु प्रदान गरिएको रोल्पा अस्पतालका सूचना अधिकारी तथा सत्प्रयास समूहका अभियान्ता कुलबहादुर डाँगीले जानकारी दिनुभयो । शिविरमा सेवा लिनेहरु मध्ये दात सम्बन्धी १ सय ११ जना, भिडियो एक्सरे २ सय ६०, हाडजोर्नी २ सय ८७, स्त्रीरोग सम्बन्धी १ सय ५५, जनरल फिजिसियन सम्बन्धी २ सय १०, वेस्ट अंकु सर्जरी १२, मार्नर वती ५ फिजियो थेरापी १४ जनाले सेवा लिएको उहाँले बताउनुभयो । सोहि अवसरमा ५ सय ४ जनाले नसर्ने रोगको परीक्षण पनि गरेका थिए ।
रोल्पामा विशेषज्ञ सेवा दिने अस्पतालहरु नभएकाले गाउँगाउँमा शिविर सञ्चालन गर्दा दुरदराजमा रहेका आर्थिक रुपले विपन्न भएका र रोगले ग्रसित भएका व्यक्तिले सेवा पाउने गरेको सत्प्रयासका अभियान्ता खेम बुढाले बताउनुभयो । आम मान्छेहरुमा स्वास्थ्य सचेतना फैलाउन पनि यस खालको शिविरको आयोजना गरिएको बताउनुभयो ।
स्वास्थ्य शिविरमा लुम्बिनी सिटी अस्पताल एण्ड मेडिकल साइन्स प्रालि वुटवलबाट हाडजोर्नी तथा नशा रोग विशेषज्ञ डा. सोमबहादुर आले, कन्सल्टेन्ट फिजिसियन डा. द्वारीका प्रधान, ब्रेस्ट अंको सर्जन डा.सन्जय पाण्डे, कन्सल्टेन्ट रेडियोलोजीस्ट डा. गोकर्ण पन्थी, प्रसूति महिला निःसन्तान तथा आइभीएफ विशेषज्ञ डा. प्रदीप कुमार श्रीवास्तवले सेवा दिनुभएको थियो । त्यस्तै रोल्पा अस्पतालबाट वरिष्ठ प्रसुति तथा स्त्रीरोग विशेषज्ञ डा. प्रमोद कट्टेल, डेन्टल सर्जन डा.सुर्य प्रताप रैदास, मेडिकल अधिकृत डा. मुबासिर हुसैन खान,डा. नीरज घर्तिमगर र प्राथमिक स्वास्थ्य केन्द्र सुलिचौरमा कार्यरत मेडिकल अधिकृत डा. युवराज महराले शिविरमा सेवा प्रदान गर्नुभएको थियो ।
