मंसिर १२ गते २०८२
दाङ। लुम्बिनी प्रदेशका किसानहरू बेमौसमी वर्षाका कारण समस्यामा परेका छन्। वर्षाले खेतमा काटेर सुकाइएको धानमा व्यापक क्षति पुगेको छ। यसले किसानको आर्थिक अवस्था र प्रदेशको समग्र धान उत्पादनमा गम्भीर असर पुर्याएको छ। कृषि मन्त्रालयका सूचना अधिकारी अनुप तिवारीका अनुसार बेमौसमी वर्षाले प्रदेशका विभिन्न जिल्लामा करीब १५ हजार ७ सय ५५ हेक्टर क्षेत्रफल धानबालीमा क्षति पुर्याएको छ।
काटेर सुकाइएको धान पानीमा डुबेर नष्ट भएको छ भने काट्न बाँकी धानको बालामा पानी जम्दा अङ्कुरण हुने जोखिम बढेको छ। यसले किसानको वर्षभरिको मेहनत नष्ट गरिदिएको छ। बेमौसमी वर्षाले धानको गुणस्तर र उत्पादनमा ठूलो गिरावट ल्याउने सम्भावना रहेको छ। कृषि ज्ञान केन्द्रले किसानलाई पानी निकासको उचित व्यवस्था मिलाउन र घाम लाग्ने वित्तिकै धानलाई छिटो सुकाएर भित्र्याउन आग्रह गरेको छ। लुम्बिनी प्रदेशमा करिब तीन लाख हेक्टर क्षेत्रफलमा धानबाली लगाइएको थियो।
