वैशाख ५ गते २०८३
प्यूठान । बाहिरी जिल्लाबाट आयात हुने कुखुरा तथा अण्डामा रोक लगाउने निर्णय भएको छ । जिल्ला स्तरीय बर्ड फ्लु नियन्त्रण समितिको शुक्रबार बसेको बैठकले बाहिरी जिल्लाबाट आयात हुने कुखुरा तथा अण्डाजन्य उत्पादनमा नियन्त्रण गर्ने निर्णय गरेको हो ।
देशका विभिन्न जिल्लामा बर्ड फ्लु रोग देखा परेकोले १५ दिनका लागि आयातमा रोक लगाउने निर्णय भएको समितिका सदस्य सचिव एकीकृत कृषि तथा पशुपन्छी विकास कार्यालय प्यूठानका प्रमुख विनोद शर्माले जानकारी दिनुभयो । १५ दिनपछि अवस्था मुल्यांकन गरि आवश्यक निर्णय गरिने उहाँले बताउनुभयो ।
साथै बैठकले जिल्लाका कुखुरापालन गर्ने व्यवसायीलाई कुखुरा फर्मको अनिवार्य रुपमा जैविक सुरक्षा अपनाउन निर्देशन दिने निर्णय गरेको छ । यस अवधिमा कुखुरा तथा अण्डाको मुल्यवृद्धि गर्न नदिने र गरेको पाइएमा कारवाही गर्ने बैठकको निर्णय रहेको छ ।
प्रमुख जिल्ला अधिकारी शान्तिराज प्रसाईंको संयोजकत्वमा जिल्ला स्तरीय बर्ड फ्लु नियन्त्रण समिति रहेको छ । बैठकमा जिल्लाका सरोकारवालाहरुको सहभागिता रहेको थियो ।
