वैशाख १ गते २०८३
काठमाण्डौ – पश्चिम नवलपरासीको पुरानो पालिका रामग्राम नगरपालिकाले, नगरपालिका स्थापना भएको २९औं वर्षमा पहिलो पटक स्थापना दिवस मनाएको छ ।
शनिवार नगरपालिका परिसरमा आयोजना भएको कार्यक्रममा मेयर धनपत यादवले नगरपालिकामा नगरबासी जम्मा भएर उत्सवको रूपमा मनाएको बताउनुभयो । नगरका उपलब्धि बारे नागरिकलाई जानकारी गराउन यो दिवस मनाउन शुरुवात गरिएको उहाँको भनाइ छ ।
कार्यक्रममा लुम्बिनी प्रदेशका वन तथा वातावरण मन्त्री देवकरण प्रसाद कलवारले नागरिकको जनजीविकाका विषयमा सहजता आवश्यक भएको उल्लेख गर्दै पालिकादेखि प्रदेश र संघीय सरकारले नागरिकलाई सहज रूपमा दैनिक सेवा प्रवाह गर्नुपर्नेमा जोड दिनुभयो ।
कार्यक्रममा नगरपालिकाले चार वर्षको अवधिमा शिक्षा, स्वास्थ्य, खानेपानी, पूर्वाधार विकास लगायतका क्षेत्रमा महत्त्वपूर्ण उपलब्धि हासिल गरेको जनाएको छ । कार्यक्रममा विभिन्न क्षेत्रमा योगदान पुर्याएका मानिसलाई सम्मान पनि गरिएको थियो ।
