श्रावण १६ गते २०८२
प्यूठान। जिल्लाको झिमरुक गाउँपालिका ५ ओखरकोटमा चोयाचित्रा सम्बन्धि एक महिने तालिम सम्पन्न भएको छ । उद्यमीलाई प्रवर्दन गर्न र आर्थिक विस्तारमा जोड्ने उदेश्यले सञ्चालन गरिएको तालिम बुधबार सम्पन्न गरिएको हो ।
तालिमले गाउँपालिकाबासीहरुमा रहेका उद्यमीहरुलाई थप स्वरोजगार र जीवन सहज बनाउने गाउँपालिकाका अध्यक्ष पित बहादुर महतरा क्षेत्रीले बताउनुभयो । यस्ता कार्यले यस क्षेत्रमा रहेका बासँ, न्याला तथा चोयाचित्रामा प्रयोग हुने बस्तुहरुको प्रयोग हुने र उत्पादनमा विस्तार हुने अध्यक्ष महतरा क्षेत्रीले बताउनुभयो । यसबाट सजावटका सामाग्री, डोका, मान्द्रो, सुपो मोबाइल स्ट्यान्ड, हाते पंखा, मुढा, बाँसको कुर्सी, टेबुल, बेदबाँसको कुर्सी टेबुल र्याक, जुत्ता स्ट्यान्ड जस्ता सामाग्री उत्पादन गर्दै आएको ओखरकोट चोयाचित्रा उद्योग अध्यक्ष दल बहादुर जिसी जानकारी दिनुभयो ।
उत्पादित सामाग्री बुटवल तथा जिल्लाका स्थानीय बजारमा बिक्रीवितरण भईरहेको छ । ओखरकोट चोयाचित्रा उद्योगले सामाग्री उत्पादन तथा बिक्रीवितरणबाट करिब १ लाख ५० हजार बार्षिक आम्दानी गर्दै आएको जिसीले बताउनुभयो ।तालिममा उद्यमीहरुलाई प्रमाण पत्र समेत हस्तान्रण गरिएको हो ।
२०८० सालमा स्थापना गरिएको ओखरकोट चोयाचित्रा उद्योगले गतवर्ष २२ जना उद्यमीलाई सीप दिएको थियो भने यस आर्थिक वर्षमा ३२ जना उद्यमीलाई तालिम दिएको छ ।
