वैशाख १ गते २०८३
काठमाण्डौ । लेयर्स कुखुरा पालक सङ्घले फार्महरूको मूल्यलाई आधार बनाएर आजदेखि लागू हुने गरी अण्डाको मूल्य बढाएको छ ।संघका अनुसार अण्डाको उत्पादनमा कमी र माग बढेपछि मूल्य बढेको हो । बढेको मूल्यअनुसार ठूलो अण्डा एक क्रेट अर्थात ३० वटाको फार्म मूल्य ४६५ रुपैयाँ पुगेको छ । यसअघि प्रतिक्रेट ४५० मा बिक्री भइरहेको थियो ।
यस्तै मझौला अण्डाको फार्म मूल्य ४०० बाट बढेर ४१५ रुपैयाँ कायम भएको छ ।गएको मङ्सिरमा अण्डाको मूल्य हालसम्मकै उच्च भएको थियो । त्यस बेला फार्ममा ठूलो अण्डा प्रतिक्रेट ५६५ र मझौलाको ५५० रुपैयाँ थियो । सङ्घका अध्यक्ष विनोद पोखरेलका अनुसार कुखुरामा देखिएको रोग र बढ्दै गएको गर्मीका कारण उत्पादनमा कमी आएको छ ।
नयाँ वर्षको पूर्वसन्ध्यादेखिनै भएको पर्यटकीय चहलपहल र गतिविधि बढेका कारण अण्डाको माग बढेको छ । सङ्घले बजारको अवस्थाअनुसार अण्डाको समर्थन मूल्य तय गर्दै आएको छ ।
