श्रावण ४ गते २०८३
काठमाण्डौ – बङ्गलादेशसँगको एकदिवसीय शृङ्खला अफगानिस्तानले जितेको छ । तीन खेलको शृङ्खला अफगानिस्तानले एक खेल अगावै जितेको हो । यसअघि भएको पहिलो खेल पनि अफगानिस्तानले पाँच विकेटले जितेको थियो ।
गएराति भएको शृङ्खलाको दोश्रो खेलमा अफगानिस्तानले बङ्गलादेशलाई ८१ रनले हरायो । अफगानिस्तानले दिएको एक सय ९१ रनको लक्ष्य पछ्याएको बङ्गलादेश २८ ओभर तीन बलमा एक सय नौ रनमा अलआउट भयो । बङ्गलादेशका तौहिद हरिदीले २४ र सेफ हसनले २२ रन बनाए । अफगानिस्तानका रशिद खानले पाँच विकेट लिए । यस्तै अजमातुल्लाह उमरजाईले तीन र नङ्गेलिया खरोटेले एक विकेट लिए ।
त्यसअघि अबुधाबीमा टस जितेर ब्याटिङ गरेको अफगानिस्तान ४४ ओभर पाँच बलमा एक सय ९० रनमा अलआउट भएको थियो । अफगानिस्तानका इब्राहिम जाद्रानले ९५ रन बनायो । बङ्गलादेशका मेहदी हसन मिराजले तीन, तन्जिम हसन साकिब र रिशाद हुसेनले दुई तथा तनवीर इस्लामले एक विकेट लिए ।
तीन खेलको एकदिवसीय शृङ्खलाको तेश्रो तथा अन्तिम खेल पर्सि मङ्गलवार हुनेछ । यी दुई टोलले तीन खेलको टी–२० शृङ्खला पनि खेलेका थिए । टी–२० शृङ्खलामा बङ्गलादेशले अफगानिस्तानलाई क्लीन स्वीप गरेको थियो ।
