वैशाख ३ गते २०८३
काठमाण्डौ – पाकिस्तानका ब्याटर फखर जमानमाथि बल ‘ट्याम्परिङ’ अर्थात् बलको स्वरूप बिगारेको आरोप लागेको छ ।
पाकिस्तान सुपर लिग (पीएसएल) मा लाहोर कलन्दर्सका ब्याटर जमानलाई हिजो कराँची किङ्ग्ससँगको खेलमा बल ट्याम्परिङको आरोप लागेको पाकिस्तान क्रिकेट बोर्ड (पीसीबी) ले विज्ञप्तिमार्फत जनाएको छ ।
कराँचीले लाहोरले दिएको १२९ रनको लक्ष्य पछ्याइरहेको अवस्थामा खेलको अन्तिम ओभर शुरू हुनुअघि जमानले बलको स्वरूप परिवर्तन गर्न खोजेको भन्दै अम्पायरहरूले लाहोरलाई ५ रन पेनाल्टी दिएका थिए ।
अन्तिम ओभरमा कराँचीलाई जितका लागि १४ रन चाहिएको अवस्थामा ५ रन घटेपछि ६ बलमा ९ रन बनाउनुपर्ने थियो । त्यसपछि कराँचीले ३ बलमै जीत हासिल गरेको थियो ।
क्रिकेटको नियमअनुसार खेलाडीले बल चम्काउन पाए पनि अन्य कुनै माध्यमले बलको अवस्था बिगार्न पाउँदैनन् । यस घटनामा फखर जमानमाथि १ वा २ खेलको प्रतिबन्ध लाग्न सक्छ ।
म्याच रेफ्री रोशन महानामाले आउँदो दुई दिनमा यस विषयमा निर्णय गर्ने पीसीबीको विज्ञप्तिमा उल्लेख छ ।
