श्रावण ३ गते २०८३
काठमाण्डौ – नेपाल आयल निगमले आजदेखि खाना पकाउने एलपी ग्यासको आपूर्ति सहज हुने र अभाव हट्ने दाबी गरेको छ । सहजै ग्यास पाउन नसकेको उपभोक्ताको गुनासो आइरहेका बेला निगमले अब सहज बन्दै जाने जनाएको हो ।
माघ लागेयता मुख्य गरी काठमाण्डौ उपत्यकामा ग्यासको अभाव छ । उपभोक्ताले पालो पर्खिनुपर्ने बाध्यता छ । बिक्रेताले ग्यास छैन भन्दै फर्काउने गरेको र डिपोहरूले समेत अभावले आपूर्तिमा समस्या रहेको बताएका छन् । जाडोमा ग्यासको खपत केही बढ्ने र समस्या हुने गरेको उनीहरुको भनाइ छ ।
भारतबाट मासिक ४९ हजार ५ सय मेट्रिक टन ग्यास आउने गरेको छ । नेपाल आयल निगमका उपनिर्देशक तथा प्रवक्ता मनोजकुमार ठाकुरका अनुसार निगमले अहिले देशभर रहेका ६० वटा उद्योगमा भारतबाट आएको ग्यास उपलब्ध गराएको छ ।
निगमले बजारलाई सामान्य अवस्थामा फर्काउन उपभोक्तालाई अनावश्यक भण्डारण नगर्न अनुरोध गरेको छ । साथै चुनावका लागि लक्षित गरी थप दुई हजार मेट्रिक टन ग्यास आयात गर्ने तयारी भैरहेको प्रवक्ता ठाकुरले बताउनुभयो ।
