असार १२ गते २०८३
काठमाण्डौ – फिफा विश्वकप फुटबलमा आज राति पौने १ बजे समूह ‘आई’ का २ वटा खेल हुँदैछन् । अमेरिकाको बोस्टन रङ्गशालामा नर्वे र फ्रान्स तथा क्यानडाको टोरन्टो रङ्गशालामा सेनेगल र इराक खेल्दैछन् ।
विश्वकपमा फ्रान्स र नर्वेबीच पहिलो पटक प्रतिस्पर्धा हुन लागेको हो । फ्रान्स र नर्वेले पहिलो २ खेलमा सेनेगल र इराकलाई हराउँदै नकआउट चरणमा पुगेका छन् ।
यो खेल जित्ने टोली समूह विजेता बन्नेछ । गोल अन्तरका आधारमा अहिले फ्रान्स शीर्ष र नर्वे दोस्रो स्थानमा छन् । यो समूहका सेनेगल र इराक अङ्कविहीन हुँदै तेस्रो र चौथो स्थानमा छन् ।
उपाधि दाबेदार फ्रान्सका केलियन एमबाप्पे र २८ वर्षपछि विश्वकपमा फर्किएको नर्वेका एर्लिङ हालान्डका कारण पनि आजको खेल बहुप्रतिक्षित छ ।
सन् १९९८ र २०२८ मा गरी दुई पटक उपाधि जितेको फ्रान्स साविक उपविजेता पनि हो ।
एमबाप्पे र हालान्ड समान ४ गोलसहित गोल्डेन बुट दौडमा पनि रहेका छन् ।
विश्वकपमा भोलि बिहान पौने ६ बजे समूह ‘एच’ का २ वटा खेल हुँदैछन् । अमेरिकाको हस्टन रङ्गशालामा नवप्रवेशी केब भर्डे र साउदी अरेबिया तथा मेक्सिकोको ग्वाडालजारा रङ्गशालामा उरुग्वे र स्पेन खेल्दैछन् ।
तालिकामा स्पेन ४ अङ्कसहित शीर्ष, समान २ अङ्कसहित उरुग्वे दोस्रो तथा केब भर्डे तेस्रो र १ अङ्कसहित साउदी अरेबिया पुछारमा छ ।
विश्वकपमा भोलि बिहान पौने ९ बजे समूह ‘जी’ का २ वा खेल हुँदैछन् । क्यानडाको बीसी प्लेस भ्यानकुभरमा न्युजिल्यान्ड र बेल्जियम तथा अमेरिकाको सिएटल रङ्गशालामा इजिप्ट र इरान खेल्दैछन् ।
तालिकामा इजिप्ट ४ अङ्कसहित शीर्ष, समान २ अङ्कसहित इरान दोस्रो र बेल्जियम तेस्रो तथा १ अङ्कसहित न्युजिल्यान्ड पुछारमा छ ।
